పాల్వంచ క్వారీ నిర్వాహకులకు వార్నింగ్ ఇచ్చిన పోలీసులు

తెలంగాణ / లిబర్టీ న్యూస్ : భద్రాద్రి కొత్తగూడెం జిల్లా పాల్వంచ మండల పరిధిలోని తోగ్గూడెం క్వారీలను శుక్రవారం కొత్తగూడెం ఓ.ఎస్. డి  పరితోష్ పంకజ్ ఆకస్మికంగా తనిఖీ చేశారు. మొత్తం 7 క్వారీలను తనిఖీ చేసిన అనంతరం క్వారీల నిర్వాహకులతో సమావేశం నిర్వహించారు. ఈ సందర్భంగా ఆయన మాట్లాడుతూ తనిఖీల్లో పేలుడు పదార్థాల వినియోగానికి సంబంధించిన రికార్డులు సక్రమంగా లేవని అసహనం వ్యక్తం చేశారు. అసాంఘిక శక్తులకు క్వారీల నిర్వాహకులు సహకరిస్తే చట్టపరమైన కఠిన చర్యలు తీసుకుంటామని హెచ్చరించారు. క్వారీల్లో బ్లాస్టింగ్ కు  ఒకరోజు ముందే పోలీసులకు సమాచారం అందించాలని సూచించారు. క్వారీలలో రికార్డుల నిర్వహణ సరిగా ఉండాలని వారికి వచ్చిన మెటీరియల్ వినియోగించిన మిగిలిన వాటికి సంబంధించి ఆయా రికార్డులలో ఎప్పటికప్పుడు నమోదు సక్రమంగా ఉండాలని అన్నారు. సప్లయర్, క్వారీ యజమాని, సూపర్వైజర్, ఆపరేటర్లు ఎటువంటి అవకతవకలకు పాల్పడిన కఠిన చర్యలు తీసుకుంటామని హెచ్చరించారు.  పాల్వంచ సీఐ, రూరల్ ఎస్సై ప్రతినెల ప్రతి క్వారీని క్షుణ్ణంగా తనిఖీ చేయాలని ఆదేశించారు.